૧૦૮ ની ટીમ દેવદૂત બની: પોરબંદરના બાપોદર પાસે એમ્બ્યુલન્સમાં કરાવાઈ સફળ પ્રસૂતિ

૧૦૮ ની ટીમ દેવદૂત બની: પોરબંદરના બાપોદર પાસે એમ્બ્યુલન્સમાં કરાવાઈ સફળ પ્રસૂતિ

​૧૦૮ ના EMT પુરીબેન અને પાયલોટ મેરુભાઈની સમયસૂચકતાથી માતા અને નવજાત બાળકનો જીવ બચાવાયો

​પોરબંદર:

આધુનિક સમયમાં ૧૦૮ ઇમરજન્સી સેવા ગરીબ અને જરૂરિયાતમંદ પરિવારો માટે આશીર્વાદરૂપ સાબિત થઈ રહી છે. પોરબંદર જિલ્લાના બાપોદર ગામના વાડી વિસ્તારમાં આજે આવી જ એક ઘટના બની હતી, જેમાં ૧૦૮ ની ટીમે સમયસૂચકતા દાખવી એમ્બ્યુલન્સની અંદર જ સફળ પ્રસૂતિ કરાવી માનવતાનું ઉત્તમ ઉદાહરણ પૂરું પાડ્યું છે.

​શું હતી સમગ્ર ઘટના?

​

મળતી માહિતી મુજબ, બાપોદર ગામના વાડી વિસ્તારમાં રહેતી એક સગર્ભા મહિલાને આજે અચાનક પ્રસૂતિની અસહ્ય પીડા ઉપડી હતી. પરિવારજનોએ તુરંત ૧૦૮ ને જાણ કરતા બાપોદર લોકેશનની ૧૦૮ એમ્બ્યુલન્સ ગણતરીની મિનિટોમાં ઘટનાસ્થળે પહોંચી હતી. મહિલાને હોસ્પિટલ લઈ જવાની તૈયારી ચાલી રહી હતી, પરંતુ પીડા ખૂબ જ વધી ગઈ હોવાથી હોસ્પિટલ પહોંચવું શક્ય જણાતું નહોતું.

​રસ્તામાં જ ગુંજ્યો બાળકનો કિલકિલાટ

​પરિસ્થિતિની ગંભીરતાને સમજીને ૧૦૮ ના EMT પુરીબેન અને પાયલોટ મેરુભાઈએ પોતાની આવડત અને તાલીમનો ઉપયોગ કરી રસ્તામાં જ સુરક્ષિત પ્રસૂતિ કરાવવાનો નિર્ણય લીધો હતો. આ કુશળ ટીમની મદદથી મહિલાએ એમ્બ્યુલન્સમાં જ સ્વસ્થ પુત્રને જન્મ આપ્યો હતો.

​અધિકારીઓએ બિરદાવ્યા

​પ્રસૂતિ બાદ માતા અને બાળક બંનેને પ્રાથમિક સારવાર આપી વધુ સારવાર અર્થે પોરબંદરની સરકારી હોસ્પિટલ ખાતે ખસેડવામાં આવ્યા હતા. ૧૦૮ ની ટીમની આ ઉત્કૃષ્ટ કામગીરી બદલ જિલ્લા પ્રોગ્રામ મેનેજર આકાશ સાહેબ અને એક્ઝિક્યુટિવ દર્શક સાહેબ દ્વારા સમગ્ર ટીમને અભિનંદન પાઠવવામાં આવ્યા હતા. સ્થાનિક લોકોએ પણ ૧૦૮ ની સેવાની આ કામગીરીને બિરદાવી હતી.