પોરબંદર: આધુનિક યુગમાં જ્યારે તમામ સુવિધાઓ આંગળીના ટેરવે ઉપલબ્ધ છે, ત્યારે દરિયાની વચ્ચે ફસાયેલા લોકો માટે '108 બોટ એમ્બ્યુલન્સ' આશીર્વાદરૂપ સાબિત થઈ રહી છે. તાજેતરમાં પોરબંદરની બોટ એમ્બ્યુલન્સની ટીમે મધદરિયે એક બીમાર ખલાસીને તાત્કાલિક સારવાર આપી માનવતાનું ઉત્તમ ઉદાહરણ પૂરું પાડ્યું છે.
ઘટનાની વિગત
મળતી માહિતી મુજબ, 'અંજલિ કૃપા' નામની ફિશિંગ બોટ દરિયામાં માછીમારી કરી રહી હતી, ત્યારે તેમાં સવાર 42 વર્ષીય ખલાસી યોગેશભાઈ પ્રેમજીભાઈ પાંજરીને અચાનક છાતીમાં અસહ્ય દુખાવો ઉપડ્યો હતો અને સાથે લોહીની ઊલટીઓ થવા લાગી હતી. સ્થિતિ ગંભીર જણાતા તાત્કાલિક પોરબંદર 108 બોટ એમ્બ્યુલન્સનો સંપર્ક કરવામાં આવ્યો હતો.
દરિયાની વચ્ચે 'દેવદૂત' બની પહોંચી ટીમ
કોલ મળતાની સાથે જ બોટ એમ્બ્યુલન્સના EMT રાજેશ જોષી અને તેમની ટીમ સજ્જ થઈ દરિયામાં રવાના થઈ હતી. ટીમે સમય ગુમાવ્યા વગર મધદરિયે પહોંચી દર્દીને પ્રાથમિક સારવાર આપી હતી અને તેમની સ્થિતિને સ્થિર કરવાનો પ્રયાસ કર્યો હતો. ત્યારબાદ દર્દીને સલામત રીતે કાંઠે લાવી, વધુ સારવાર માટે રોડ એમ્બ્યુલન્સ મારફતે હોસ્પિટલ ખસેડવામાં આવ્યા હતા.
"આધુનિક સમયમાં બોટ એમ્બ્યુલન્સની સેવા દરિયાખેડુઓ માટે જીવનરક્ષક સાબિત થઈ રહી છે. ગમે તેવા કપરા સમયે અમારી ટીમ સેવામાં ખડેપગે રહે છે."
અધિકારીઓએ બિરદાવી કામગીરી
આ સફળ અને સરાહનીય કામગીરી બદલ જિલ્લા પ્રોગ્રામ મેનેજર આકાશ સાહેબ તથા એક્ઝિક્યુટિવ દર્શક સાહેબ દ્વારા 108 બોટ એમ્બ્યુલન્સની ટીમને અભિનંદન પાઠવવામાં આવ્યા હતા. પોરબંદરના સ્થાનિક માછીમાર સમાજમાં પણ 108ની આ તત્પરતાની ભારે પ્રશંસા થઈ રહી છે.
0 Comments