આર્ય કન્યા ગુરુકુલમાં એક પાત્રીય અભિનય સ્પર્ધા યોજાઈ: દીકરીઓએ ઐતિહાસિક પાત્રો અને સામાજિક સમસ્યાઓને જીવંત કરી

પોરબંદર:

શહેરની પ્રતિષ્ઠિત શિક્ષણ સંસ્થા આર્ય કન્યા ગુરુકુલ (ગુજરાતી માધ્યમ) ખાતે આચાર્યા ડૉ. રંજનાબેન મજીઠીયાના માર્ગદર્શન હેઠળ ધોરણ 6 થી 9 અને 11 ની વિદ્યાર્થીનીઓ માટે 'એક પાત્રીય અભિનય સ્પર્ધા'નું શાનદાર આયોજન કરવામાં આવ્યું હતું. આ સ્પર્ધામાં દીકરીઓએ પોતાની અભિનય કલા દ્વારા ઉપસ્થિત સૌને મંત્રમુગ્ધ કરી દીધા હતા.

વિવિધ થીમ પર કલાનું પ્રદર્શન

સ્પર્ધાને બે મુખ્ય વિભાગોમાં વહેંચવામાં આવી હતી:

વિભાગ ૧ (ધોરણ 6 થી 8): આ વિભાગની થીમ 'ઐતિહાસિક અને ધાર્મિક પાત્રો' રાખવામાં આવી હતી. જેમાં 26 દીકરીઓએ ભાગ લીધો હતો. વિદ્યાર્થીનીઓએ રાણી લક્ષ્મીબાઈ, ભારત માતા, સરદાર વલ્લભભાઈ પટેલ, રાણી પદમાવતી, શિવાજી, રવિશંકર મહારાજ તેમજ લક્ષ્મીજી, રાધા, મીરા, સીતાજી અને શબરી જેવા પાત્રો ભજવી પ્રેક્ષકોને ભક્તિ અને શૌર્યના રસે તરબોળ કર્યા હતા.

વિભાગ ૨ (ધોરણ 9 અને 11): આ વિભાગમાં 'સામાજિક સમસ્યાઓ' થીમ અંતર્ગત 22 દીકરીઓએ પ્રસ્તુતિ કરી હતી. જેમાં મોબાઈલનું વળગણ, સમયનું મહત્વ, ગરીબી, બેટી બચાવો, પર્યાવરણ જાળવણી અને બાળ વિવાહ જેવી ગંભીર સમસ્યાઓ પર હૃદયદ્રાવક અને કરુણાસભર અભિનય રજૂ કરી સામાજિક જાગૃતિનો સંદેશ આપ્યો હતો.

નિર્ણાયકો અને વિજેતાઓ

આ સ્પર્ધામાં નિર્ણાયક તરીકે હંસાબેન પરમાર, મેહુલાબેન સાદિયા, વિભાબેન મોઢા તથા મનીષાબેન ઓડેદરાએ સેવા આપી હતી. પ્રદર્શનના આધારે પ્રથમ, દ્વિતીય અને તૃતીય વિજેતાઓની પસંદગી કરવામાં આવી હતી, જેમને સંસ્થા દ્વારા પુરસ્કાર અને પ્રમાણપત્ર આપી પ્રોત્સાહિત કરવામાં આવ્યા હતા.

ટીમની જહેમત

સમગ્ર કાર્યક્રમને સફળ બનાવવા માટે સ્પર્ધા સમિતિના સભ્યો મોનિકાબેન મોઢા, પ્રિયંકાબેન બરિદૂન અને અંકિતાબેન વડગામા સહિતના શિક્ષિકા બહેનોએ ભારે જહેમત ઉઠાવી હતી. સંસ્થાના આચાર્યા ડૉ. રંજના મજીઠીયાએ તમામ સ્પર્ધકો અને સહયોગી સ્ટાફને અભિનંદન પાઠવ્યા હતા.