પોરબંદર:
આધુનિક યુગમાં જ્યારે તમામ સુવિધાઓ આંગળીના ટેરવે ઉપલબ્ધ છે, ત્યારે દરિયાના મોજાંઓ વચ્ચે કામ કરતા માછીમારો માટે '૧૦૮ બોટ એમ્બ્યુલન્સ' આશીર્વાદરૂપ સાબિત થઈ રહી છે. ગમે તેવી કપરી પરિસ્થિતિ કે રાત-દિવસ જોયા વગર દર્દીની વહારે પહોંચતી ૧૦૮ ની ટીમે તાજેતરમાં એક માછીમારનો જીવ બચાવી પ્રશંસનીય કામગીરી કરી છે.
ઘટનાની વિગત
ગઈકાલે રાત્રિના આશરે ૦૯:૩૦ કલાકે 'અમર મોતી' નામની ફિશિંગ બોટમાંથી ઇમરજન્સી કોલ મળ્યો હતો કે, દરિયામાં માછીમારી કરી રહેલા દિલીપભાઈ લખમભાઈ વંશ (ઉંમર વર્ષ ૩૭) ને અચાનક મગજનો હુમલો (Brain Stroke) આવ્યો છે. સ્થિતિ ગંભીર હોવાથી તાત્કાલિક સારવારની જરૂર હતી.
ત્વરિત રેસ્ક્યુ ઓપરેશન
સંદેશો મળતાની સાથે જ પોરબંદર બોટ એમ્બ્યુલન્સના EMT રાજેશ જોષી અને તેમની ટીમે સમય સૂચકતા વાપરી દરિયામાં પ્રયાણ કર્યું હતું. અંધારી રાતે દરિયાના પ્રવાહ વચ્ચે બોટ સુધી પહોંચી, દર્દીને તાત્કાલિક પ્રાથમિક સારવાર આપી સ્થિર કરવામાં આવ્યા હતા. ત્યારબાદ દર્દીને સલામત રીતે કાંઠે લાવી, આગળની સારવાર માટે રોડ એમ્બ્યુલન્સ મારફતે હોસ્પિટલ ખસેડવામાં આવ્યા હતા.
"૧૦૮ બોટ એમ્બ્યુલન્સની સેવા દરિયાખેડુઓ માટે ખરા અર્થમાં 'જીવનદાયિની' સાબિત થઈ રહી છે. અમારી ટીમ ૨૪ કલાક કોઈપણ પરિસ્થિતિમાં સેવા આપવા સજ્જ છે."
અધિકારીઓએ વધાવ્યા
આ સફળ અને સમયસરની કામગીરી બદલ જિલ્લા પ્રોગ્રામ મેનેજર આકાશ સાહેબ તથા એક્ઝિક્યુટિવ દર્શક સાહેબ દ્વારા ૧૦૮ બોટ એમ્બ્યુલન્સની સમગ્ર ટીમને અભિનંદન પાઠવવામાં આવ્યા હતા. પોરબંદરના માછીમાર સમાજમાં પણ આ કામગીરીની ભારે પ્રશંસા થઈ રહી છે.
0 Comments